Stores List

Isendlalelo Esinabileko Semvelaphi Yesitjhaba, Ubukhosi Namasiko WamaNdebele Nawulandelela umlando, ubukhosi, amasiko, ilimi namasikopilo wesitjhaba samaNdebele ngokunabileko, ufumana bona ngokuya kwaka-Fourie (1921:29) isendlalelo somlando, amasiko, isikopilo nelimi lesitjhaba samaNdebele, sidzimelele eendaweni eziseduze naMatsha amaKhulu asekabeni ye-Afrika eduze nendawo eyaziwa nge-Zululand. Imvelaphi yaso yasungula ngeminyaka ephakathi komnyaka we-1400 newe-1500. Ngakelinye ihlangothi ngokuya kwerhubhululo elenziwa boBaba uMahlangu wokuthoma, uMahlangu wesibili, noMahlangu wesithathu kanye noBaba uMtshweni (2014:2), amaNdebele bekawela ngaphasi kwesitjhaba ebesaziwa ngelabeNguni. Ukuze kuthiwe sitjhaba sabeNguni kungombana uNguni lo khabe kunguyise likaZulu, uXhosa, uNdebele, kanye noSwazi. Kungebangelo kwagcina sele kukhona isitjhaba samaZulu, amaXhoza, amaNdebele kanye namaSwazi. Iintjhaba bezithiyelelwa ngamabizo wamadodana wezindlwezo ezinelungelo lokuba badosiphambili bamabutho wekosi. Ngaleso sikhathi isitjhaba sabaNguni sasihlukaniswe ngeenqhema ezimbili ezaziwa ngamaThonga namaNtungwa. Kwathi ngomnyaka we-1491 kwaqubuka ipi ekulu phakathi kwamaThonga namaNtungwa; kodwana ngetjhudu elimbi isitjhaba samaNtungwa sehlulwa sitjhaba samaThonga. Ngemva kobana bahluleke, akhenge babe nokuzikhethela kodwana kwafuneka bona babone enganatjani. Badla phasi; bathi nyawozethu sithwale. Babaleka; babalekela ukuvikela iimpilo zabo